Reordenen les nueses vides...

La desapaición de la llingua ta acompangada la desapaición física de quienes veníen falandola tradicionalmente col abandonu del campu como espaciu sociabilidá y de quienes podíen llegar a facelo nel futuru, cola emigración forciada.

Asina, la precaria situación de la mocedá ye aprofitada poles istituciones y los empresarios pa esplotalos. Convidase-yos a dexar Asturies p'amosar que tienen la lleición bien aprendío: dinamismu, movilidá xeografica, cultura emprendeora, etc. Si te quedes ye porque nun tienes el dinamismu necesariu, tas apegau al pasau o quies vivir de los subsidios (nun como los empresarios). Y si con esto nun val, siempre tendrás un policía al lláu pa desplicate meyor toes eses coses que nun seyas entender por ti mesmu, o de les que la conseyera Migoya nun fuese quien convencete.

 

...y reordenen les nueses cabeces

Pero la reordenación del territoriu despoblamientu del campu, especulación, Ciudá Astur desindustrialización, etc. nun ye sólo del espaciu físico: reordenen les nueses vides al empar que les cabeces. Si nun lo tenemos en cuenta, nun podremos desplicar por qué tamos viendo morrer l'asturianu a tiempu real.

La xeopolítica ye tamién xeopolítica'l conocimientu. Ensin un sistema educativu fonderamente antiasturianu y unos medios de comunicación, como la RTPA, que tean d'espaldes a les necesidaes d'Asturies nun s'entiende'l desarraigu que sofrimos ensin malapenes resistencia. Nun ye sólo que la llingua tea un espaciu social marxinal, ye que los problemes de la nuesa xente nin son materia d'estudiu nin lleguen ser noticia.

 


L’esclusión del Otru na punta la llingua

El control social y la represión alcuentren davezu una fonte lexitimación en discursos centraos na esclusión del Otru, pero nun siempre ye asína. Si ye posible, la diferencia esplótase en términos económicos. Por exemplu, l'exotismu pue sirvir como afalagu pal turismu. D'ehí la invención de paraísos naturales onde enantes falabemos de desiertos industriales.

Del mesmu mou, la diferencia pue rentabilizase tamién en términos ideolóxicos. L'ausencia democracia y participación política maquíllaxe cola esistencia d'una montonera imaxenes: determinaos manifestamientos culturales son sacaos de contestu y amuestrense como prueba de pluralismu ensin discutiniu posible.

Pero pa comprender lo que ta pasando cola cultura y la llíngua d'esti país, fáese necesariu atalantar como delles dinámiques tresformen lo estremao na víctima propiciatoria d'un proyeutu homoxenizador, tantu no económicu gracies al puxu del neolliberalismu como no cultural, de la man del nacionalismu español qu'encabecen la FSA ya'l PP n'Asturies.

L'Otru venga de fuera o alcuéntrese ya viviendo equí ye talamente la imaxen del crimen. El nacionalismu español sigue la mesma llínea argumental pa esplotar inmigrantes qu'amenacien con disolver el raigañu lo español como pa falar de quintacolumna que quier dixebrar España dende dientru.

 


Criminalicen fasta les pallabres

Si amás d'esto topámonos col control y la represión, seya por apegar pegadielles nes faroles o por remenbra-y al presidente Areces l'ausencia drechos llingüisticos de la xente asturfalante, tenemos una panoramica pa esmolecer. Porque criminalizar significa sacar de contestu, camentar conflictos sociales col códigu penal, reconstruyilos como pleitos xudiciales y problemes individuales.

Poro defender l'asturianu tien de valir pa mirar al traviés de los nuesos güeyos, pa construyir les nueses pallabres, caminar sobre les nueses piernes y sentir col nuesu coral. Nun ye dable salvar l'asturianu escaeciendo lo que tamos careciendo. Porque hai rellación direuta ente les consecuencies de les politiques qu'emplega la FSA col sofitu la izquierda plural, que tan desarmando esti país (envieyamientu la población, emigración de la mocedá, abandonu les ales pa colar pal centru, urbanismu xabaz, baxa tasa de natalidá...) y la sobrevivencia futura la nuesa llingua.

Ye tiempu d'un “cambéu radical” por que camudar Asturies nun ye dengun delitu. Sinon, la represión siguira ensin tener consecuencies pa unes instituciones que ta xugando un papel cimeru na crisis que padez esti país no cultural, no economicu, no social... Y los 4 años que mos asperen dempues d'estes elleiciones, van ser un infiernu pa quienes nun sabemos, nin tenemos, onde abellugamos.